Aaj ke time me internet ki wajah se kundali dekhna bahut aasan ho gaya hai, lekin asli problem tab aati h jab kundali samajhni hoti hai. Bahut log free me kundali to bana lete h, par unhe ye samajh nahi aata ki usme jo likha huva hai uska matlab kya hai. Is article me mai aapko simple language me, step by step aur detail me samjhaunga,jisse aap apni kundali khud se dekhkr samajh payege.
Sabse pehle ye samajhna jaruri h ki kundali hoti kya hai. Kundali ek tarah ka birth chart hota h jo aapke janam ke exact samay par grahon ki position ko dikhata h. Jab aap paida hue the, us waqt sky me surya, chandra, mangal, shani jaise grah kis jagah par the, wahi sab kundali me record hota h. Isi base par aapki life ke baare me prediction kiya jata h, jaise career, shaadi, paisa aur health.
Ab baat karte h ki kundali banane ke liye kya-kya chahiye. Iske liye aapko teen basic cheeze chahiye hoti hai:
Date of Birth (DOB),Exact Birth Time,Birth Place
Inme sabse important birth time hota h. Agar birth time galat ho gaya to lagna change ho sakta h aur pura result ulta ho sakta h. Isliye jitna ho sake accurate time use karo.
Ab aapko ye samajhna h ki kundali kaise banai jati h. Iske liye aap Google par “free kundali online” search karo. Bahut sari free websites mil jayengi jahan aap bina paise ke apni kundali generate kar sakte ho. Website open karne ke baad aapko apni details fill karni hoti hai aur “Generate Kundali” button par click karna hota hai. Kuch hi seconds me aapki kundali ready ho jati h.
Ab sabse important part aata h – kundali ko samajhna. Jab aap kundali dekhoge to aapko ek chart dikhega jisme 12 alag-alag boxes ya houses hote h. Inhe hi “12 ghar” kaha jata h. Ye 12 ghar aapki life ke alag-alag areas ko represent karte h. Agar aapko inka matlab samajh aa gaya to aap kundali ka major part samajh jaoge.
Sabse pehla ghar lagna hota h, jise ascendant bhi kehte h. Ye ghar aapki personality ka base hota h. Isse pata chalta h ki aap kaise dikhte ho, aapka nature kaisa h aur aap duniya ke samne kaise present hote ho. Agar ye ghar strong ho to insaan confident aur self-made hota h.
Dusra ghar paisa aur family se juda hota hai. Ye ghar batata h ki aapki income kaise hogi, aapki savings kitni strong hogi aur aapka family background kaisa hoga. Is ghar se aapki speech bhi dekhi jati h, matlab aap bolne me kitne effective ho.
Teesra ghar mehnat aur courage ka hota hai. Ye batata h ki aap me kitni himmat h aur aap kitni mehnat kar sakte ho. Communication skill, writing, speaking aur skills development isi ghar se jude hote hai. Ye ghar bhai-behen se bhi related hota h.
Chautha ghar sukh aur comfort ka hota h. Is ghar se maa, ghar, property, gaadi aur mental peace ke baare me pata chalta h. Agar ye ghar strong ho to insaan ko life me sukh-samriddhi milti h.
Panchva ghar intelligence aur love ka hota h. Isse aapki education, creativity aur love life ke baare me pata chalta h. Agar ye ghar strong ho to insaan creative hota h aur uski love life bhi stable hoti h.
Chhatha ghar thoda challenging hota h. Ye dushman, disease aur loan ka ghar hota h. Agar ye weak ho to insaan ko health issues ya financial problems ho sakti h. Lekin ek positive side ye bhi h ki ye ghar competition me jeet dilata h.
Saatva ghar shaadi aur partnership ka hota hai. Isse aapki marriage life, life partner aur business partner ke baare me pata chalta h. Ye relationship ka main ghar hota h.
Aathva ghar sabse mysterious mana jata hai. Ye sudden events, secrets, accident aur long life ko show karta h. Is ghar ko samajhna thoda difficult hota h, lekin ye life ke hidden aspects ko reveal karta hai.
Nauva ghar bhagya aur dharm ka hota hai. Isse luck, religion, guru aur long distance travel ke baare me pata chalta hai. Agar ye strong ho to insaan ko life me support aur success milti hai.
Dasva ghar career ka sabse important ghar hota h. Ye aapki job, business, status aur fame ko show karta hai. Agar aapko apna career dekhna h to sabse pehle isi ghar ko analyze karo.
Gyarahva ghar income aur profit ka hota h. Ye batata h ki aap kitna kamaoge aur aapke goals complete honge ya nahi. Friends aur network bhi isi ghar se jude hote h.
Barahva ghar expenses aur loss ka hota h. Isse kharcha, foreign travel aur isolation ke baare me pata chalta h. Agar ye strong ho to insaan foreign se fayda bhi kama sakta h.
Ab sirf ghar samajhna hi kaafi nahi h, aapko grahon ka role bhi samajhna hoga. Kundali me main 7 grah hote h jo life par sabse jyada effect dalte h:
1.Surya power aur authority ko dikhata hai
2.Chandra mind aur emotions ko control karta hai
3.Mangal energy aur action ka planet hai
4.Budh intelligence aur communication ka planet h
5.Guru knowledge aur wisdom deta hi
6.Shukra love aur luxury ka planet hai
7.Shani discipline aur struggle ka symbol h
Kundali ka asli logic hota h “planet + house = result”. Matlab kaunsa grah kis ghar me baitha h, usi se result nikalta h. Agar koi strong planet achhe ghar me ho to positive result milta h, aur agar weak planet galat ghar me ho to challenges aate h.
Iske baad aata h rashi aur lagna. Rashi aapka moon sign hota h jo aapke emotions aur thinking pattern ko control karta h, jabki lagna aapki outer personality ko dikhata h. Dono ko samajhna jaruri h kyunki ye aapki complete personality banate hai.
Ab baat karte h dasha system ki. Dasha ek time period hota hai jo batata he ki aapki life me kab kya hone wala hai. Har insaan ke life me alag-alag grah ki dasha chalti h. Jaise shani ki dasha me mehnat aur struggle badhta h lekin long term me growth milti h, jabki guru ki dasha me knowledge aur success badhta h.
Agar aap beginner ho aur kundali samajhna chahte ho to ek simple trick follow karo:
Sabse pehle lagna check karo
Fir 10th house (career) dekho
Fir 7th house (marriage) dekho
Last me dasha check karo
Is simple process se aap basic level par kundali samajh jaoge.
Akhir me ek important baat samajh lo ki kundali ek guide h, guarantee nahi. Ye aapko direction deti h, lekin aapki mehnat aur decision sabse jyada important hote h. Agar aap mehnat nahi karoge to strong kundali bhi kuch nahi kar payegi.
Is tarah aap ghar baithe free me apni kundali dekh sakte ho aur samajh sakte ho. Thodi practice ke baad aap isme expert bhi ban sakte ho aur dusron ki kundali bhi basic level par analyze kar sakte ho.
